والله الموضوع محفوظ وحلو جدا ومفيد لكل بيت
(لغة النص مكتوبة بطعم الأكل وبطريقة قابلة للفهم والتنفيذ)
اولا الطماطم : نشترى الطماطم مستوية وبعدين نضربها فى الخلاط ونصفيها بصفايه .. وبعدين نحط لكل كيلو طماطم تلات ملاعق سمن ونسيبها لحد ماتنشف الماء خالص وبعدين نحطها فى اكياس وكل كيس على قد الاكلة..
ثانيا الثوم:نشترى الثوم فى شهر مايو لان سعره بيكون رخيص وكمان بيكون مش جديد فيبقى تقشيره صعب ولا قديم فيبقى فاضى ونجيب الثوم ونقشره ونحطه فى الخلاط ونحط معاه لكل كيلو ثوم اتنين ملعقة كبيرة زيت ونص ملعقة ملح.ثم نضربهم لحد مايبقى ناعم.ونحط معظم الكمية فى برطمان زجاجى (والزيت عشان لون الثوم ما يتغيرش وكمان يحتفظ بالنكهة بتاعته. اما الملح عشان مايجمدش فى الفريزر ونعرف نخد منه بالمعلقة بطريقة سهلة). وباقى الكمية بنحط معاهم فى الخلاط فلفل اخضر وكسبرة خضرة وكمون كتير ونضربهم مرة تانية لحد ما المكونات تنعم ونحطهم فى برطمان تانى عشان تتبيل السمك وطواجن الجمبرى والكاليمارى.وتتبيلة البدنجان المخلل وحاجات كتير.وبيقعد عندنا من السنة للسنة اللى بعدها
ثالثا البسلة:نجيب البسلة ونخرج حبوب البسلة من قشرتها ونحطها فى كيس مع جزر مقطع مكعبات صغيرة .وبس
رابعا الفاصوليا:نقطع طرفى الفاصوليا وبعدين نقطع الفاصوليا الى قطع متوسطة وبعدين نكون حاطين على النار حلة فيها ماء مغلى وملح ونسقط الفاصوليا لمدة دقيقة بعد ما نشيل الحلة من على النار ونصفيها فى مصفاة وبعد ما تتصفى خالص نكون مجهزين طبق فيه ماء وثلج كتير ونحط المصفاه بالفاصوليا في الماء المثلج لمدة ثوانى حتى تحتفظ بلونها اخضر زاهى .ثم نصفى الفاصوليا مرة اخرى ونعبيها فى اكياس على حسب الأكلة..
خامسا الخضرة (الحباش) :بالنسبة للبقدونس والكسبرة والشبت نغسلهم كويس اوى وننقعهم بعد كده فى ماء مضاف ليه معلقة خل وبعدين نفرمهم ناعم اوى بمخرطة الملوخية ونصفيهم لمدة ساعتين على قطعة قماش وبعدين نحطهم فى كيس وكل ما نحتاج شويه ناخدهم من الكيس على طول..وبنستخدمه لخلطة المحشى والممبار والفول بالتقلية وساعات لما بيكون عندنا عزومة بنفرشهم تحت الاكل فى الطبق ونرشهم على الطبق
سادسا البطاطس المقلية:بنقشر البطاطس ونغسلها بعد مانقشرها بس.وبعدين نقطعا صوابع متوسطة وطويلة. وننقعها فى ماء ساخن وملح وخل وملعقة سكر.(لكل كيلو بطاطس 1لتر ماء ساخن و3ملعقة ملح صغيرة وربع كوب خل وملعقة سكر) ونتركها فى الماء منقوعة لحد مايبرد (مش اوى ) يكون دافئ ونحمرها فى زيت غزير وساخن جدا ونقلبها باستمرار لكن بعد ما تاخد اللون الاصفر الفاتح.. ونقلبها لحد لونها ما يبقى دهبى فاتح وبعدين نشيلها على ورق ماص للزيت ونسيبها لحد ماتبرد وبعدين نحطها فى علبة بلاستيك فى الفريزر. ونخرجها فى اى وقت على الطاسة اللى فيها زيت ساخن جدا على طول من الفريزر(عشان درجة برودة البطاطس هتقلل درجة حرارة الزيت فلازم يكون الزيت سخن اوى اوى)
سابعا ورق العنب :بنقوم برص ورق العنب واحدة عكس واحدة.يعنى نمسك الورقة من العنقود ونحطها فى اتجاه معين والورقة اللى بعدها ونخلى العنقود فى الجهة الاخرى .ثم نشيلهم فى اكياس فى الفريزر ولما بنطلع الكيس بنسلق ورق العنب وهو متجمد..
ثامنا الباميه :بنقمع البامية ونغليها لمدة تلات دقائق فى مية مغلية على النارونطلعها من المية المغلية على مياة فيها مثلجة (فيها تلج) ونصفيها كويس من المية ونشيلها فى اكياس ولما بنستخدمها بنحطها وهى متجمدة مش بنسيبها تفك عشان لونها يبقى حلو مش غامق.
ليست هناك تعليقات:
إرسال تعليق