كل عام وانتم بخير ورمضان جاى فى السريع
اليومين الجايين دول هما موسم المشمش وبيبقي رخيص ومتوفر في كل حته وبيعملوا منه المشمشية والقمر الدين
هاقولكم علي سر من اسرار طريقة عمل الحاجات دي في البيت وباقل من نص الثمن وممكن كمان تشتروا الفواكه دي من وكالة الجمله بالقفص وبكده توفر اكتر
تشترى المشمش وتراعي انه يكون سليم ومظهره جيد ومستوي
لامهري ولا اخضر ثم اغسله جيدا وبعدين ابدأ في شيل النواة وفي حله صاج حط طبقات مشمش وطبقات سكر لكل خمسة كيلو مشمش كيلو سكر- غطيه وأتركه لتاني يوم او من الصبح لليل هاتلاقيه نزل ميه كتير جدا - بعد كده ارفعه علي النار( في الاول عاليه) لحد ما يغلي وبعدين خفف النار جدا وابدا تقلبه كل ربع ساعه لحد ماتلاقيه استوي وبدأ يتهري تقريبا
لو عاوزه يبقي لفات زي الجاهز بتسيبه ينهري جدا وتديله ضربه في الخلاط وبعدين تجيب ورق زبده وتفرده في صواني حافيتها مش عاليه وممكن صينية الفرن وتدهنه زيت زيتون وتفرد عليه الخليط بسمك نص سم ( الخليط بيبقي غليظ جدا ) وتسيبه في مكان متجدد الهوا يوم او اتنين لحد ما يجف تماما وبعد كده تدهن الوش بزيت زيتون وتلفه وتشيله لحين الأستخدام_ وتوجد طريقة اسهل
بعد ما بيستوي علي النار باسيبه يبرد واعبيه في اكياس وعلي الديب فريزر علي طول بيبقي مش متجمد بيبقي عامل زي الجيلاتي كده عند الاستخدام باكسر منه حته علي اد ما انا عاوز وازود ميه وسكر واضربهم في الخلاط واشرب احلي قمر الدين واعمل مهلبيه براحتك ياعم وكل عام وانت بخير
ليست هناك تعليقات:
إرسال تعليق